Qarabağda külləri sovrulan separatçı-terrorçu rejimin pul vəsaitləri haradadır?.. - HƏQİQƏTƏN DƏ...

Azərbaycan Respublikasının Qarabağ iqtisadi rayonunun bir hissəsində 32 il öncə qondarılmış və bu gün dövlətimizin siyasəti, şəhid və qazilərimizin canı-qanı hesabına artıq külləri sovrulan separatçı-terrorçu rejim əsasən İrəvandan göndərilən müəyyən məbləğdə pul vəsaitinə malik olmuşdu.

Tereqqi.az-ın xəbərinə görə, Moderator.az-ın araşdırmasından bəlli olur ki, cinayətkar xuntanın 2023-cü il üçün qondarma “büdcə”sinin xərcləri 215 milyard 171,4 milyon dram(təxm. 505 milyon 900 min ABŞ dollar) məbləğində nəzərdə tutulubmuş.

Bəs həmin pul vəsaitlərinin taleyi necə olub?..

Qarabağdakı "nağd pulun dərhal Ermənistan bazarına daxil olmasının hansı nəticələri var? Yaxın gələcəkdə nə gözləmək olar? Mövzu həm də ondan ibarətdir ki, artsax əhalisi arasında müəyyən miqdarda nağda pul da var idi. O zaman artsaxın bank sistemində, o cümlədən Mərkəzi Bankda həmin vəsaitlərin taleyini hələ də müəyyənləşdirmək lazımdır”.

Ermənistanın “İravunk” qəzeti bu suallara Ermənistan Mərkəzi Bankının keçmiş sədri Baqrat Asatryandan cavab almağa çalışıb.

Bəhs edilən vəsaitin harada, kimlərin nəzarətində ola biləcəyi haqda heç bir açıqlama verməyən keçmiş sədr Qarabağın dağlıq hissəsindən “mümkün pul axınının Ermənistanın maliyyə sisteminə mümkün təsirlərindən danışıb. Asatryan hesab edir ki, sözügedən pullar ölkədəki maliyyə əməliyyatlarına ciddi təsir etməyəcək. “Lakin təbii ki, bu, dramın müəyyən devalvasiyası prosesi ilə bağlı ola bilər. Üstəlik, dramın daha da ucuzlaşmasına bankların pulu deyil, məcburi köçkün vətəndaşların bazara buraxdığı pullar təsir edə bilər”- deyə mütəxəssis bildirib.

Zəruri şərh:

Əvvəla, Azərbaycan dövlətinin kriminal erməni xuntasının çirkli pullarına ehtiyacı yoxdur. Lakin onların xeyli hissəsi də Azərbaycan torpaqları, sərvətləri hesabına əldə edilib. Və sözsüz ki, dövlətimizin müvafiq qurumları öncədən Qarabağdakı qanunsuz banklarda olan vəsaitlərin xeyli hissəsinin İrəvana ötürülməsinin qarşısını alıb və onlar ilk növbədə Azərbaycan vətəndaşlığını qəbul edərək ərazimizdə qalan erməni vətəndaşların ehtiyacları üçün xərclənəcək...